عود الروح

انشلع كل يوم ورقه
وانته بين اسطوري ثلجه وابرد ابكدّك
واجرّش وانه نار وانجمد مرّات عده

وانته عود الروح لم روحي بسواجي الشوك
لهفه محجبه باسمك يمن ذجرك يفرح الروح مدّه

ينفرشلي الشوك من طول المسافات البعيده عيون
مشتول برمشهه الليل ومخضّر سهر كل يوم احصده

وانفرش لك من حضن شوكي بغيابك كاع
ما ساحكهه واحد
بيهه دلّيني عله خطواتي التموت ابخطوه وحده

وأنفرش لعيونك بكل شوفه صوره بكيفك ابكل مشتهاتك
حطلي من عينك كمر ومن السواد البيهه برده

وانفرشلي بعين ضحكه وعين مصلوبه بضواهه
سنين عمري الجايّه واحرك بديك الفات مني وانته ماهو شلون عدّه

وانفرشلي جناح ريّه وارد اطيرن بيك نسمه
واشعل الظلمه الغميجه هناك .....
فجريه وضوه واتلمس جروحك حمل مايل عله امتونك واشدّه

هدّه هدّه المستحه بروضة جنوني جفوف تتلمس
وجع روحي الينام بطول روحي اعله الجفن ليليه ورموشي المخدّه

حتى من احلم اكمّش بيك وبفيك انام واحلم ردود واشوفك ...
وبحلم كل ما اطب احلم واشوفك جنّه وبفيهه العطر مزروع ورده

حتى نبعد عن جفوف عيون وادمنه ونروح بعيد عن عيونّه
ونتلاكه روح بروح ونعيش بضوانه بروح وحده

حتى من نموت نضحك عالوكت ما .....
جاسنه بغير الطهاره البيهه طيبتنه النظيفه
ومن كثر حب الطهاره .....
احفرلي واحفرلك كبر بالروح ماي بماي ننضب جنّه عكده

خل نموت...... انعيش..... كون اثنينّه ابفد لحظه وحده
الماي من يموت يدفن روحه بيده او تنّصبله الفاتحه بنص روحه سدّه