الماله اول ماله تالي / غازي ثجيل

الماله أول ماله تالي
چلمه خلّفها المعاتب من غفه إبحضن الليالي
چلمه مالومة إتعثر
ما شكت غير الموّدة وگلب خالي
امحزمه بضيم المغالب .. والمغالب مو طبع حباب غالي
وچلمة المامش كلافة ..
وچنت أظنك ربعه .. وادلال .. وزوالي
وانته سالي .. وانه ذاك الشگگت زيجي اعله طيفك
وانته سالي ...
وطشرت عمري بطريجك
وأنثر أيامي ابشماته وضيم حالي ..
اعذيبي ظنيتك أبارح حتى كل نسمة التعدت ..
چنت أگولن ياشمالي
تالي تطلع شرجي عالي ..
چلمة المالوم كلفة .. الماله اول ماله تالي
كافي چا چم أدوب أكابر ..
وأشمر عيوني التجديك الوفه ابذل الجداوه ..
كافي دولبني الدليل الضهد روحي ..
وما سمع چلماتي من راح يتغاوه
كافي چلماتك خناجر
واللي تجرح چلمة البطران من يحچي برهاوه
الماعرف طعم المحبة وماي هجرك طين خاوه ..
ما عرفني وعرف حالي ..
وچلمة المالوم كلفة ... الماله أول ماله تالي
تالي شنهي .. وشنهي تالي
يلمشيت إبزوم تربيلك مواعيدي وزماني
لا جرف دجلة الشهدنه
وناغه چلمات الوفه ابروجه ولهاني
ولا اطعوس الرمل ذيچة ولا أثرنه ابرمل شاطينه العماني
وخورة الجاري وبلمته اشراع من لفني وخذاني
وجرة الحدّار جره وحوبة الشاطي النسيته ومانساني
وششچي حالي ...
وچلمة المالوم كلفه ... الماله اول ماله تالي
تالي ياروحي انتحزم نشرب اعيون الليالي كدر صافي
ليش ياروحي انتندم .. شنهي ... شمسوين مو گلنة عوافي
ياما روانه الوكت حلو الوصال ونگط الود اعله شافي
يا ما ليل الزلف لفنه وتم عمرنه ابراگه غافي
هسه حزّمنه المكازر ندس بسيوف التجافي
انعيش ساعة غيض وكسه ..
وياهو گال الوكت صافي ..
هذا ديدان المحبة وهذا تالي
وچلمة المالوم كلفه ... الماله اول ماله تالي

هذه القصيدة هي من روائع المرحوم الشاعر غازي ثجيل