كالولي تجي وفزيت..
قصيدة للشاعر الكبير كريم القصاب
وبجاني الفرح صار شحلاته البيت..
ومتدت اديه اشلون ما ادري..
ونرسمت االشبكه بغير ما ادري..
ورحت للباب..
كالولي تجي اووصيت بيك الباب..
كتله الجاي,,
بيه نيشان بوسه,
ودمعه من تيزاب..
كتله الجاي,
حافظ كل سوالفنه على كلبه,
وحافظ كل غنه الغياب..
كتله الجاي,
رايح ينحني اكبالك يشبعك بوس,
ويشاور العتبه بشفه من عطاب..
اووصيته, كبل ما تنحني له,
يضحك ابوجهك,
ياخذ بوستي منك,
ويكول افيش اجونا احباب..
بيبان العشك مفتاحهن بوسه,
وهمس خلاب..
كالولي تجي وحطت عصافير المحله,
امتانيه الخطار..
واغصان الشجر,
نفضن ورك حنه وصواني ازغار..
وعودان البخور اشتهن طعم النار..
وحرك روحه الشمع ,
من سمع بيك وذاب..
وانا الخاطرك ,
رشيت ماي الورد عالعتبه
وغشيت برفيف الكلب شباجي
كلت يمكن يجيك تراب..
وبلهفه عطش تانيت,
تانيتك تجي لكلبي,
تجي لعيني,
مثل جية حلم من غير دكة باب ..
وبلهفة عطش تانيت,
واستعجل نبض كلبي عليك,
او وكفت الساعه,
ومدري شلون,
غبت اويا الشمس,
وتجرح اللبلاب..
وبلحظه صحو اتذكرت وين انا,
وعرفت الكال لي جذاب..
وجذب نسيان حرك اعصاب..
عرفت الكال لي جذاب..
وعرفتك ماتجيني,
ونكسر كلبي ,
وكسرت الباب..